Plat proate?

Vur idderiën di gear Hôrsters prot, of beater gezach: idderiën di gear Limburgs prot, is d'r en aparte Hyve gemàkt woa weej met zien alle kunne zurge dat ut Limburgs ni verloare giët... (Nou zien weej vaan gans Nederland nag wal de previnsie met die miëste platproaters, ut is altied good um det te bevestige...

Druk op 'Lees Verder' vur ut ganse berich, ma ut kump d'r gewoën op neer det ge lid mot weure van de Dialektiks Hyve. O ja, Dialektiks is ni "Dyslektisch" op op z'n dyslektisch geschreve. Ut heit éch zoë.
En umdet weej zoë Hôrsters gerich zien, doon weej gear mej!

DialekTiks
Limburgs dialek goes Hyves

Bis dich ‘ne Limburg-goeroe? Is ‘t Limburgs dien modertaal? Of vings se ’t gewoeën leuk um in ‘t Limburgs te praote, te maile en te ‘krabbele’? Dan is DialekTiks de online community veur dich! Waer nou lid van de DialekTiks-Hyve en vertel os waorum-s tich geer in ‘t dialek communiceers. D’r zien gen spelregels aan verbonge, behalve det d’r natuurlik in ‘t Limburgs gekrabbeld, gekwekt en getikt mot waere.

Hyves, waem kint ‘t neet? Met mar leefst 7,1 miljoen leje is dit snelgrujjende vriendenetwerk oetermate populair. ‘t Principe is gemekkelik. De geis nao hyves.nl, de maks gratis ‘n profiel aan, ‘pimps’ ‘t nao hartelus en de geis op zeuk nao ‘vriende’ (minse, organisaties, vereiniginge, etc. die ouk ‘ne Hyve hebbe). Hes dich ‘n femilielid, ‘ne kennis oet ‘t verre verleje of de plaatselike laesclub gevonge? Dan begint ‘t echte werk. De kins dan ‘kwekke’ (chatte) en ‘krabbele’ (berichjes plaatse) met dien vriende.

De streektaalfunctionarisse van ’t Hoes veur de Kunste Limburg inventarisere momenteel wie jongere in os provincie ‘t Limburgs dialek gebroeke in de moderne werreld van internet en mobiele telefonie. Alles wiest d’rop det Limburgers duk gebroek make van eur streektaal. Neet allein in mails en chat-sessies op ‘t internet, mar ouk in sms’jes (in Limburg wurt, in verhouding tot anger provincies, ‘t meist in ‘t dialek gesms’t!). ‘t Is onvermijdelik det ‘t Limburgs dialek ouk Hyves verovert en ‘n kwestie van gedöld tot hiel Limburg DialekTiks vult.

De DialekTiks-Hyve guft jongere de mogelikheid um op ‘n spontane en informele wieze met angere dialeklovers ín, mar veural ouk mét ‘t Limburgs dialek bezig te zien. Pas dich in ‘t profiel van emes dae de ganse tied in ‘t Limburgs sms’t, chat, mailt of hyve’t? En bis dich ouk nog us tusse de 12 en 25 jaor? Kiek dan snel op dialektiks.hyves.nl en waer lid! De meist actieve en creatieve leje winne biezongere prieze, dus ‘krabbel’, ‘kwek’ en ‘tik’ d’r op los!

Reacties